تخيلوا كدة كل واحد حياتة عبارة عن شريط سينما طويل يبدا من اول ماييجى الدنيا لحد مايسيبها بنفس سرعة الاحداث ساعات تبقى رتيبة وتفتكرها ماشية بسرعة ابطأ وكلنا عارفين اننا هنموت ف اخر الفيلم بس برضة بنفضل نتفرج عشان عاوزين نعرف بالظبط اية اللى حصل وحصل ازااى !!
انا بقى زى مابيقول( العسيلى) تخيلت كدة فعلا ان انا البطلة(yeah) !مش هفرح اوى كدة عشان اكتشفت ان الفيلم هيبقى ممل جداا او مش هيجييب ايرادات اصلا ولا هيتحط ف اى(box office) يعنى مثلا... تخيلوا معايا قاعدة ع النت مثلا 5 ساعات ف اليوم ..اللى بيتفرج هيعمل اية ! اقل حاجة يعملها هيقفل التليفزيون او لو ف سينما هيتخانق و يزعق وياخد فلوس تذكرتة!بصراحة انا لو مكانة هعمل كدة طب بلاش دى وانا نايمة مثلا (ملحوظة) بنام 10 ساعات ف اليوم! او وانا برغى مع اصحابى او اخواتى ف الجامعة !!
اعترف ان الفيلم هيتصنف لدى النقاد(كوميدى -دراما-تراجيدى-اجتماعى) لا انكر انة لن يخلو من بعض الاكشن ولكن اعترف ايضا انة سيخلو من اى نوع من انواع الرومانسية لذلك اطمئنوا ..لن يندرج تحت قائمة (للكبار فقط)!
يمكن الحاجة الوحيدة اللى انا شاكة انها هتبقى حلوة ف الفيلم الخاتمة ..خاتمتى ترضى ربنا ولا لأ ..يعنى مش كفاية البداية!
هبقلى فرحانة اوى و فخورة لو جة مشهد ليا وانا بصلى او حد بيتخانق معايا ومش برد وساكتة او لما اقوم لحد محتاج يقعد ف الميكروباص او لما اتصدق لحد محتااج!!!
بس الحبكة الدرامية بقى هتبقى ف اية ! هتبقى انى كدبت ومتكشفتش او صراع نفسى داخلى اتفرج ع التليفزيون ولا اقوم اذاكر !
معرفش الفيلم هيبقى مدتة 30/40/50/60 سنة اعذرونى اصل انا البطلة والمخرجة و المنتجة والسيناريست كماان
من قوانين الفيلم
1-الفيلم مقتبس من قصة واقعية
2-لا يجوز اعادة المشاهد بمعنى ان المشهد اللى جة مينفعش الجمهور يعمل(cut-edit-pause-play-stop) لان الزراير دى ماكنتش موجودة ف الواقع يبقى للاسف مش هتبقى موجودة ف الفيلم!
3-الفيلم جزء واحد فقط لانها ببساطة حياة واحدة فقط..
4-يمكن ابقى مشهورة بعد مايتعرض عشان كدة عاوزاة يتعرض بعد الدفن
ف النهاية اتمنى مشاهدة ممتعة ليست لى فقد شاهدتة من قبل
مشاهدة ممتعة لكم !!
جامدة جداً على فكرة يا إسراء لاء بجد عجبتني ^_^
ردحذف